Baixo o lema ‘Xuntos somos máis fortes’ as centrais sindicais estatais e o PP convocan manifestacións este 1º de maio nas principais cidades galegas.

Despois do preacordo alcanzado coas centrais sindicais CCOO e UGT o vicepresidente da Xunta de Galicia, Alfonso Rueda, acaba de anunciar que o Partido Popular participará nas manifestacións do primeiro de maio que se celebrarán nas principais cidades do país.

CSIF e USO xa anunciaron que apoian as marchas se ben non acudirán á convocatoria xa que a celebración do día do traballo soamente pode conducir ‘ao bolcheviquismo’. A pesar do anterior comunicaron que valoran a unidade na esquirolaxe e que ese é o camiño a seguir.

Afiliados de base de CCOO e UGT xa criticaron que se celebren actos conxuntos co Partido Popular pero os líderes da centrais xunto con delegados e cadros sindicais replicaron que os millóns para formación e as aportacións aos plan de pensións privadas non son para deixalos pasar. ‘La cosa está malita. Las pensiones bajan y hay que pensar en el futuro’, declararon fontes próximas ás cúpulas das dúas organizacións.

Pola súa banda, voceiros do PP amosáronse moi satisfeitos pola convocatoria e xa anunciaron a presenza do vicepresidente Alfonso Rueda na manifestación de Vigo.