Informacións recollidas na prensa escrita poderían estar falando do ‘sorpasso’.

Baltar está enoxado, alguén ameaza o seu trono de ferro, o seu récord Guinness, o número de porteiros da súa macroinstitución provincial poderíase ver sobardado polos traballadores públicos doutra institución.

Segundo se fan eco algúns xornais galegos, a Marea Atlántica, partido que goberna con puño de ferro a cidade da Coruña está a darlle alcance no fito que marcaba a deputación ourensá en canto a número de conserxes contratados.

Tal e como afirman fontes xornalísticas, o concello herculino xa estaría asinando novos traballadores máis alá do número 80 das listas de contratación o que situaría ao ente municipal a menos de 100 traballadores dos que agora mesmo traballan en Baltaria.

Tras consultar coa Deputación de Ourense, desde esta aseguran que o seu récord non se atopa en perigo, e se dado o caso así o fora, o PP de Ourense ten a capacidade e a dispoñibilidade de hordas humanas que poderían chegar a cubrir o dobre de postos dos que agora mesmo están a funcionar.