A formación porá un afiador á disposición da súa militancia

A II Asemblea Nacional de Anova-Irmandade Nacionalista prevese tensa e, para ‘facilitar’ os acordos, a formación porá un afiador á porta do Pazo de Congresos e Exposición de Santiago de Compostela, lugar onde se celebrará a asemblea, para que todo o mundo poida ter as súas armas nas mellores condicións posíbeis.

“Trátase dunha decisión en prol da transparencia”, declaran dende a formación. Preguntados polos medios sobre se a asemblea vai ser das de ‘coitelo nos dentes’ dende a formación nacionalista responden que “a asemblea pode ser tensa, incluso pode haber loita pero o afiador tamén está aí para cumprir a función social de quen se queira facer o harakiri“.

Fontes non oficiais apuntan a que Mariano Abalo irá vestido de ninja mentres que Mario L. Rico utilizará un traxe amarelo como o que fixo famoso Uma Thurman na película de Quentin Tarantino Kill Bill. Non transcendeu nada sobre a vestimenta de Beiras e, polas últimas informacións que chegaron a esta redacción, sospéitase que Martiño Noriega levará sombreiro.