Tras os grandes resultados nas pasadas europeas ao longo do país, o partido de Pablo Iglesias faise un oco no concello lugués

“Eu son o portavoz porque me elixiron, aquí existe autonomía porque non se piden carnés nin militancias, ‘Podemos’ somos todos, toda a cidadanía, e neste partido a cidadanía constitúese en asembleas con total autonomía, onde ademais poden atoparse distintas sensibilidades, ideoloxías e crenzas, porque todos temos en común unha cousa, e é que estamos fartos de Beiras, Martiños e da corrupción”. É a carta de presentación de Luis Eyré, ate o de agora militante de Anova e que seguirá compaxinando co traballo no Cadrado Podemos de Chantada.

Pero non está só, xunto a el unha ducia de persoas, as cales expresaban a súa intención previa de que Anova confluíse co BNG e Podemos, Equo, Compromís, Partido X e Bildu de cara as Europeas, serán así mesmo copartícipes da extensión e implantación no municipio. “Formaremos un chisme desos, un cadrado, aquí en Chantada”, engade.

Por todos estes motivos, e porque xa cansados de que “PP, PSOE, EU, UPyD… Todos sexan o mesmo”, este grupo dos chamados nacionalistas de Anova, decidiu unirse para crear o “Cadrado” Podemos de Chantada, que celebrará asembleas periódicas. Segundo opinan desde ‘Podemos Chantada’, “neste país hai que reivindicar outro modo de facer cultura e non a forza de pagar”.

Respecto da desconfianza xeneralizada existente por parte dos cidadáns de cara a calquera político, proceda do grupo que proceda, Eyré deixa claro que “En ‘Podemos Chantada’ funciónase de xeito dixital, a dedo, e todos temos a mesma importancia e as nosas opinións, aínda que algunhas loxicamente pesen máis”.

Preguntado por se os resultados de Anova/AGEE influiron nesta decisión, Luís Eyré é claro, “Nós xa no referendo apostamos polo BNG, por Podemos, por Compromís e Equo. Por todo o que non fora AGE, pero o xiro españolista de Beiras no último momento dinamitou a verdadeira fronte ampla que sería quen de derrubar ao bipartidismo”.