O Consello da Radio Televisión de Galicia acaba de aprobar un novedoso sinal acústico co que a canle separará o telexornal da propaganda electoral que se emitirá a continuación do mesmo.

Segundo explicou un directivo o sinal será a triple repetición dun si bemol que compuxo Juan Pardo para a ocasión. A cantidade económica que pagou o ente autonómico pola composición non transcendeu.

Segundo os voceiros do CRTVG a idea é que os telespectadores teñan unha idea clara de cando termina o telexornal e comeza a publicidade electoral porque, segundo explicaron, “hai moita xente que non o ten claro”.

Interese de TVE e Telemadrid

A canle autonómica de Telemadrid e a estatal TVE xa amosaron o seu interese pola iniciativa e anunciaron ter en estudio a súa implantación para próximas campañas electorais.